'Be Careful' Teen Stars, Bibida sa 'MMK' Ngayong Sabado

Sasalang na sa drama ang teen stars ng hit kilig-seryeng "Be Careful With My Heart" na sina Janella Salvador at Marlo Mortel dahil bibida sila sa "Maalaala Mo Kaya" ng ABS-CBN ngayong Sabado (Pebrero 22). Bibigyang-buhay nila ang mga karakter nina Neneng at Celo, ang dating mahigpit na magkaribal sa paaralan na kalauna'y iibig sa isa’t isa. Paano pinaglapit ng tadhana ang dati'y aso't pusa sa eskwela? Sisiklab bang muli ang kompetisyon sa pagitan ng dalawa sa sandaling maging mas matagumpay sa buhay ang isa? Bahagi rin ng "MMK" episode nina Janella at Marlo sina Veyda Inoval, Kyle Banzon, Diego Loyzaga, Joshua Colet, Dominic Ochoa, Rochelle Barameda, Almirah Muhlach, Lander Vera Perez, at Marithez Samson. Ang episode ay idinerek ni Raz de la Torre, sinulat nina Joan Habana at Arah Jell Badayos, at isinaliksik nina Akeem del Rosario at Johnny Cruz. Ang “MMK” ay pinamumunuan ng business unit head nito na si Malou Santos, production manager na si Roda Dela Cerna, at executive producers na sina Lindsay Anne Dizon at Niña Laureano. Huwag palampasin ang “MMK" ngayong Sabado ng gabi pagkatapos ng “Wansapanataym” sa ABS-CBN. Para sa iba pang updates, mag log on saMMK.abs-cbn.com, sundan ang@MMKOfficial sa Twitter, at i-“like” ang Facebook.com/MMKOfficial.